Houbo moitas cousas bonitas a semana pasada na homemaxe aos Beatles que se levou a cabo na sala Capitol de DC: tocar para un local a rebentar, escoitar aos Niño y Pistola ensaiando I am the walrus na ducha dos camerinos, flipar coa Eleanor Rigby que fixo Narf, sentar (por descuido!) sobre a americana de Camilo Franco (perdón!), …

A primeira parte do concerto pode verse aquí e aquí, e hai tamén fotos por aquí (gracias ás persoas ás que roubamos os enlaces). A hora inicial pode escoitarse no arquivo do programa Planeta Furancho, que dirixe o amigo Vituco Neira en Radio Galega Música. A nosa interpretación por aplastamento de Please please me e Helter skelter, ao final da noite, tentaremos conseguila en breve.

Para os que xa non somos tan chavales, tamén foi un gusto coincidir cos Burgas Beat, aos que algúns xa admirábamos, e moito, cando eran Cosecha Roja. E moito máis cando Carlos Rego, ese crack, nos anuncia que a tan mítico grupo ourensán lle acaban de editar un disco con todo o que tiñan gravado nos noventa, e que, ademais, van presentalo por aí en directo. Para empezar, o sábado en Ourense. Viva!

Espectador a un dos Homens, de iniciais J.B.L.T.: “Pues ahora que te veo fuera del escenario no pareces tan mayor…”

Carriña, rocanrol e pasteis de nata… Todo foi perfecto na viaxe da pasada fin de semana a Lisboa. Con Ana á fronte do evento non podía ser doutro xeito. Queremos darlle moitas gracias á xente da Xuga e á do Bacalhoeiro por un concerto que non esqueceremos. Temos moita sorte, si!

Por certo, o mércores estaremos destrozando Please please me e Helter skelter na homenaxe aos Beatles que se leva a cabo no marco de Cineuropa, o festival de cine de Santiago DC, que proxecta as películas oficiais do grupo que fixo do pop o que é. Tamén han de andar por alí Niño y Pistola, os Burgas Beat e outros tantos. O asunto empeza ás 23.00 e é na sala Capitol, e custa 3 euros.

Ah! E aquí está a metade dos Homens facendo como que se deixan entrevistar…

Alá que nos vamos, mañá ben cediño, camiño de Lisboa, onde actuaremos a iso das doce da noite, na Noite Galega que se vai levar a cabo no Colectivo Cultural Bacalhoeiro. Témoslle ganas ao bolo; non sei por que, pero dános que temos a fin de semana eufórica, e reencontrámonos despois duns meses co noso padriño e factótum Tomás Ageitos, así que da cita pode saír algo grande (ou desastroso, que tamén cabe a posibilidade!). O concerto organízao a asociación Xuventude Galega en Europa, e, ademais de debates, proxeccións e visitas a ese milagro urbano que é Lisboa, o programa inclúe este concerto no que acompañaremos no escenario a Miguel Harguindey, o rapeiro Gran Purismo e o DJ Rubalkavra. Se alguén se anima, que apareza alá, como dicía o Reinolds.

The Homens + Gran Purismo + Miguel Harguindey + DJ Rubalkavra

Noite galega, primeira Xuntanza da Xuventude Galega en Europa

Colectivo Cultural Bacalhoeiro, Rua dos Bacalhoeiros, 125 LISBOA

Técnico máster habitual a os Homens, en xeral, despois dun bon concerto: “Vistes? Media fanequiña, unha ensalada e unha piecita de fruta e saídes tocar coma leóns”.

Técnico máster habitual a os Homens, en xeral: “A vosoutros hai que darvos unha cea frugal para que me rindades no escenario”.

Non se sabe ben por que, pero contra final de ano sempre facemos uns cantos concertos ben curiosos, en lugares e con motivos diferentes aos habituais, e iso está moi ben. Antes da presentación da Cuarta potencia (recordade, o 17 de decembro na Nasa, en Santiago DC) andaremos por estes escenarios:

- O 7 de novembro tocaremos no Bacalhoeiro COOLectivo COOLtural, en Lisboa, no marco da primeira Xuntanza da Xuventude Galega. Compartiremos palco con Miguel Harguindey e Gran Purismo (grande!), pero a cita ten un programa moi extenso durante toda a fin de semana. Podedes consultalo aquí.

- O 11 de novembro faremos un par de temas nunha homenaxe aos Beatles que vai haber na Sala Capitol, en Santiago DC. Seguiremos informando en canto vaiamos sabendo máis cousas. Que ninguén espere Yesterday, iso si.

- O 3 de decembro participaremos nunhas xornadas sobre música galega que organiza a AS-PG en Lugo. Tocamos pola tarde no Museo Provincial, penso. Sigan atentos á pantalla.

- Finalmente, o 17 de decembro presentaremos na Nasa, en DC, Cuarta potencia, ao tempo que Novedades Carminha fan o propio con Te vas con cualquiera. Festón de Lixo Urbano, xente, a non perder.

Espectadora (nun día de público máis ben escaso) a Wu: “Oye, ¿tú eres el que canta?”
Wu: “Sí, sí”.
Espectadora: “¿Y no tendrías que ir enmedio? ¿Por qué te pones a un lado del escenario? ¿No es peor para el sonido?”
Wu: “Es que enmedio el que va es el guapo”.

Algunha cousa máis da nosa Cuarta potencia, que xa está en proceso de gratinado: se en Tres tivemos dúas colaboracións fantásticas (Eugeni Bigas, que tocou a trompeta, e Cristina Pujol, que nos fixo os acordeóns), desta vez tampouco temos queixa ningunha. Ademais de Santi García, que taraboulou en cantas maracas, panderetas e trebellos ten no estudio, tamén nos botou unha man (literalmente) coas percusións Roger Ortega (No More Lies e agora Vista Alegre, ollo con este grupazo!). E, por encima, Isa, das Charades, cantounos un pedaciño de ‘Costa Brava’ e, coma todo o que fai, bordouno. Naturalmente, estes detalles son o mellor do disco.

GRACIAS!!!!!!!!!!!!!!

Mentres conduciamos camiño de Lleida (preciosa sala, estupenda xente, superior xantar do que xa falaremos), o máster de Cuarta potencia chegou a Santiago DC. Escoitarémolo (só un pouquiño) e, inmediatamente, partirá camiño da República Checa, onde se farán as copias de vinilo e cedé correspondentes. Calculamos que nun mesiño a operación estará rematada.